» » » Formula 1 ilə bağlı təmir olunacaq yollar haqqında NİİM-dən öyrənəcəksiz

Formula 1 ilə bağlı təmir olunacaq yollar haqqında NİİM-dən öyrənəcəksiz

Formula 1 ilə bağlı təmir olunacaq yollar haqqında NİİM-dən öyrənəcəksiz

Xüsusi qurğuların quraşdırılması işləri mərhələli şəkildə aparılacaq.

Bakı Şəhər Halqası (Baku City Circuit) gələn il Bakıda keçiriləcək Formula 1 Avropa Qran Prisi ilə bağlı paytaxtın mərkəzi küçələrində tikinti işlərinin aparılması və hərəkətin məhdudlaşdırılması ilə əlaqədar mətbuatda yayılan məlumatlara aydınlıq gətirib.

Şirkətdən ucarliyiq.biz-a daxil olan məlumata görə, Beynəlxalq Avtomobil Federasiyasına təqdim olunmuş layihə üzrə şəhər halqasında xüsusi asfalt qatının çəkilişi və digər tikinti-quraşdırma işləri əsasən 2016-cı ilə nəzərdə tutulub. 

Şirkət tikintiyə bağlanacaq yollarda təmir-tikinti işlərinin əhalinin məişətinə və yol hərəkətinə təsirini minimuma endirmək üçün xüsusi plan tərtib edib və onun həyata keçirilməsi üçün aidiyyatı olan dövlət qurumları ilə sıx əməkdaşlıq edir. 

Yüksək keyfiyyət meyarına əsasən hazırlanacaq asfalt yollarının, sonradan yerin dərin qatında yerləşən kommunal qovşaqlarında yarana biləcək nasazlıq halları üzündən sökülməsinin qarşısını indidən almaq məqsədilə hal-hazırda aidiyyatı olan qurumlar tərəfindən önləyici tədbirlər görülür. 

Bilavasitə Formula 1 yarışı üçün salınacaq asfalt qatının çəkilişi, tamaşaçı tribunalarının tikintisi, trek boyu beton baryerlərin və Hökumət Evinin qarşısında Formula 1-ə aid xüsusi qurğuların quraşdırılması işləri mərhələli şəkildə aparılacaq. Bəzi ərazilərdə əhalinin gündüz saatlarında hərəkət axınına əngəl yaratmamaq məqsədilə işlər gecə növbəsi üzrə həyata keçiriləcək. 

Nəqliyyat Nazirliyi Nəqliyyatı İntellektual İdarəetmə Mərkəzi (NİİM) ilə əməkdaşlıq edən Bakı Şəhər Halqası, 2016-cı ildə müvafiq küçə və prospektlər üzrə yolların bağlanması haqqında məlumatı öncədən insanlara çatdıracağını bəyan edir. 

Qeyd olunmalıdır ki, Formula 1 yarışı standartına cavab verən yenilənmiş yollar qran pridən sonra paytaxt sakinlərinin istifadəsində olacaq.