» » » 2 mindən çox əcnəbi Azərbaycanın qanunlarını pozdu

2 mindən çox əcnəbi Azərbaycanın qanunlarını pozdu

2 mindən çox əcnəbi Azərbaycanın qanunlarını pozdu

500-dən çox xarici vətəndaş məcburi qaydada ölkədən çıxarıldı.

Azərbaycanda oktyabr ayı ərzində 2297 əcnəbi tərəfindən ölkədə olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərinin pozulması halları müəyyən edilib.

Bu barədə Dövlət Miqrasiya Xidmətindən ucarliyiq.biz-a bildirilib.

“Onlardan 19-nun Azərbaycan ərazisində müvəqqəti və ya daimi yaşamaq üçün əsas verən sənədləri itirildiyindən yenisi ilə əvəz olunub, 191 nəfərin ölkə ərazisində yaşamaları leqallaşdırılıb, 1570 əcnəbinin ölkə ərazisini 48 saat ərzində tərk etmələri, 517 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.

Ay ərzində xidmətə əcnəbilər və vətəndaşlığı olmayan şəxslər tərəfindən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin verilməsi, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazələrinin verilməsi və mövcud iş icazələrinin müddətlərinin uzadılması ilə bağlı 11 448 müraciət daxil olub.

Müraciətlərin hər biri ayrı-ayrılıqda Azərbaycan qanunvericiliyinin tələblərinə uyğun olaraq araşdırılıb və müvafiq qərarlar qəbul edilib”, - deyə Xidmətdən  qeyd edilib. 

Bundan başqa, xidmətdən verilən məlumata görə, ötən ay ərzində olduğu yer üzrə qeydiyyatla bağlı 48 407 əcnəbinin müraciəti qeydə alınıb.

“İşəgötürənin ölkə qanunvericiliyinin tələblərini pozmaqla iş icazəsi alınmadan əcnəbinin və ya vətəndaşlığı olmayan şəxsin haqqı ödənilən əmək fəaliyyətinə cəlb edilməsi hallarının aşkar edilərək qarşısının alınması məqsədilə Xidmətin müvafiq struktur bölmələrinin əməkdaşları tərəfindən 20 halda yoxlama aparılıb, 17 halda qanun pozuntusu aşkar edilib və qanunvericiliyə uyğun olaraq müvafiq tədbirlər görülüb”, - deyə xidmətdən bildirilib.