» » » Dindarlar Nardaranda baş verən hadisəyə dair bəyanat qəbul etdilər

Dindarlar Nardaranda baş verən hadisəyə dair bəyanat qəbul etdilər

Dindarlar Nardaranda baş verən hadisəyə dair bəyanat qəbul etdilər

“Dinimizdən sui-istifadə edilməsi respublikamızın imicinə mənfi təsir göstərir”.

Azərbaycanın cənub bölgəsində yaşayan dindarlar noyabrın 26-da Sabunçu rayonunun Nardaran qəsəbəsində baş vermiş hadisələrlə bağlı bəyanat imzalayıblar.
 
ucarliyiq.biz xəbər verir ki, APA-nın məlumatına görə, bəyanatda qeyd edilir ki, son günlər baş vermiş hadisələr ciddi narahatlıq doğurur.

““Müsəlman Birliyi Hərəkatı” adlandıran qondarma qurumun pozuculuq fəaliyyətini din pərdəsi altında həyata keçirmək cəhdlərini qətiyyətlə qınayırıq”

Dindarlar özünü “Müsəlman Birliyi Hərəkatı” adlandıran qondarma qurumun ölkəmizin ictimai-siyasi sabitliyinə, tolerantlıq mühitinə, dövlət-din münasibətlərinə, hüquqi-demokratik əsaslarına qarşı yönəlmiş pozuculuq fəaliyyətini din pərdəsi altında həyata keçirmək cəhdlərini qətiyyətlə qınayıb. 

Bəyanatda bildirilib ki, heç bir rəsmi statusu olmayan “Müsəlman Birliyi Hərəkatı”nda təmsil edilən bir qrupun ölkə dindarları adından danışmağa nə hüquqi, nə də mənəvi haqqı çatır: 

“Hesab edirik ki, regionun indiki həssas dönəmində bütün dindarlar çox ayıq olmalı, daxildən və xaricdən edilən təxribatlara uymamalıdırlar.

Baş verən hadisələri əsl mahiyyətindən uzaqlaşdıraraq İslam dininə qarşı yönəldiyini iddia etmək, bu prosesləri məzhəbçilik müstəvisinə keçirmək, ölkəmizin milli və ictimai təhlükəsizliyini təhdid etmək cəhdləri bu dairələrin məkrli niyyətlərini bariz şəkildə göstərir.

Dinimizdən sui-istifadə edilməsi, onun siyasi məqsədlərə alət olunması  sülh və əmin-amanlıq dini olan İslama nəinki fayda verir, əksinə, islamafobiyanın artdığı bir dövrdə terrorizmin dinimizlə əlaqələndirilməsi istiqamətində kampaniya aparan bəzi qüvvələrin dəyirmanına su tökür, dünyada öz tolerantlığı və dini sabitliyi ilə seçilən respublikamızın müsbət imicinə mənfi təsir göstərir”.
 
Bəyanatda vurğulanır ki, Azərbaycan dünyəvi dövlətdir və bütün dini etiqadlara bərabər şərait yaradılıb. Həm dinlərarası, həm də məzhəblərarası münasibətlər çox yüksək səviyyədədir. Hər bir inanclı rahat şəkildə ibadətlərini yerinə yetirə bilməklə yanaşı, ölkəmizin ictimai-siyasi həyatında yaxından iştirak edir: 

“Dövlət tərəfindən dinə yüksək qayğı göstərildiyi bir vaxtda  müsəlmanların sıxışdırılması iddiaları ilə çıxışlar etmək, inanclıları dövlətə qarşı qaldırmaq cəhdlərinin heç bir əsası yoxdur. Bütün bunları nəzərə alaraq, biz inanclıları belə hadisələrdən ibrət almağa, Azərbaycan dövləti və onun prezidenti ətrafında sıx birləşməyə çağırır, öz xidməti vəzifələrini həyata keçirərkən şəhid olmuş  polislərimizə Allah-Taaladan rəhmət diləyirik”.