» » » "Qəbələ" Avropa Liqasında qrup mərhələsinin ilk oyununda məğlub olub

"Qəbələ" Avropa Liqasında qrup mərhələsinin ilk oyununda məğlub olub

"Qəbələ" Avropa Liqasında qrup mərhələsinin ilk oyununda məğlub olub
Bu gün "Qəbələ" Avropa Liqasında cari mövsümün qrup mərhələsində ilk oyununa çıxıb.

ucarliyiq.biz - in məlumatına görə, Roman Qriqorçukun komandası Belçikada yerli "Anderlext"in qonağı olub.

"Qırmızı-qaralar" ötən mövsümdən fərqli bu dəfə qrupda mübarizəyə məğlubiyyətlə başlayıb. Belçikalılar oyunda erkən qolla hesabı açsalar da, tezliklə fransalı hücumçumuz Baqali Dabo tarazlığı bərpa edib. Ancaq fasiləyə az qalmış "Qəbələ"nin braziliyalı müdafiəçisi Rafael Santosun avtoqolu matçın taleyini demək olar, həll edib.

İkinci hissədə daha bir qol vuran "Anderlext" yenicə meydana çıxan tanınmış legioneri Dieqo Kapelin fərqlənməsi sayəsində 3:1 hesablı qələbəsini rəsmiləşdirib.

Xatırladaq ki, "Qəbələ" qrupda debüt etdiyi ötən il mübarizəyə Bakıda Yunanıstan PAOK-u ilə qolsuz heç-heçə ilə başlamışdı. Roman Qriqorçukun komandası ikinci turda sentyabrın 29-da Almaniyanın "Maynts" klubunu qəbul edəcək.

Avropa Liqası

I tur

15 sentyabr

21:00. "Anderlext" (Belçika) - "Qəbələ" (Azərbaycan) - 3:1

Qollar: Lukaş Teodorşuk, 14, Rafael Santos, 43-öz qapısına, Dieqo Kapel, 77 - Baqali Dabo, 20

Baş hakim: Harald Laxter

Yan xətt hakimləri: Maksimilan Kolbits, Andreas Neydenreys

Əlavə hakim-köməkçiləri: Markus Hameter, Aleksander Harkam

Dördüncü hakim: Andreas Staudinger (hamısı Avstriya)

Hakim-inspektor Lusiano Luçi (İtaliya)

UEFA nümayəndəsi Emil Ubias (Çexiya)

Brüssel. "Konstant van den Stok" stadionu