» » Proqnoz: Sabah dolların məzənnəsi kəskin arta bilər

Proqnoz: Sabah dolların məzənnəsi kəskin arta bilər


Sabah ABŞ-da açıqlanması gözlənilən inflyasiya göstəricisinin gözləniləndən yüksək olması dolların məzənnəsini kəskin artıra bilər. ucarliyiq.biz-in "Forexpf.ru" saytına istinadən verdiyi xəbərə görə, "Bloomberg" agentliyi tərəfindən aparılan sorğunun nəticələrinə əsasən, analitiklər iyul ayında inflyasiyanın 0,2% olacağını düşünürlər. Son 4 ayda inflyasiyanın proqnozlardan aşağı templə artması ABŞ Federal Ehtiyat Sisteminin (FED) monetar siyasətini dəyişdirməsinə mane olur. Belə ki, FED-in uçot dərəcəsini artırması üçün əsas şərt məhz inflyasiyanın sürətlənməsidir. Faktiki isə illik inflyasiya 1,7%-dən 1,4%-ə geriləyib.

İqtisadçılar iyul ayında inflyasiyanın sürətlənməsi ehtimalını dolların ucuzlaşması, idxal qiymətlərinin artması və işçi qüvvəsinə artan tələblə izah edirlər. Buna baxmayaraq, sorğuda iştirak edən 75 respondentin 21-i inflyasiyanın 0,1% təşkil edəcəyini bildirib.

ucarliyiq.biz-in analitik qrupu bildirir ki, əgər iyul inflyasiyası 0,2% və ya daha çox olarsa, o zaman əsas valyuta cütlüyü avro/dollar məzənnəsi 1,15 USD/EUR səviyyəsinə kimi geriləyə bilər: "Əks halda, məzənnənin 1,20 USD/EUR səviyyəsinə yaxınlaşması mümkündür".

Qeyd edək ki, hazırda bu cütlüyün məzənnəsi 1,17 USD/EUR səviyyəsindədir.

scroll top