» » » Azərbaycan səfiri Afrika İttifaqı Komissiyasının sədri ilə görüşüb

Azərbaycan səfiri Afrika İttifaqı Komissiyasının sədri ilə görüşüb

Azərbaycann Afrika İttifaqı yanında daimi nümayəndəsi, səfir Elman Abdullayev Afrika İttifaqı Komissiyasının yeni seçilən sədri Musa Faki Mahamatla görüşüb.

Xarici İşlər Nazirliyinin mətbuat xidmətindən ucarliyiq.biza verilən məlumata görə, görüşdə E.Abdullayev M.Mahamatı bu mötəbər beynəlxalq təşkilatın rəhbəri vəzifəsinə seçilməsi münasibətilə təbrik edərək, Azərbaycan ilə Afrika İttifaqı arasında münasibətlərin inkişafının xüsusi önəm daşıdığını bildirib.

Səfir Azərbaycan ilə qitə ölkələri arasında əməkdaşlığın əsasının illər öncə qoyulduğunu həmsöhbətin diqqətinə çatdıraraq, Azərbaycan ilə Afrika İttifaqı arasında münasibətlərin genişləndirilməsi üçün böyük potensialın mövcud olduğunu bildirib. Ölkənin bir çox sahələrdə zəngin təcrübəyə malik olduğunu qeyd edən E.Abdullayev Afrika İttifaqı və digər Afrika ölkələri ilə öz təcrübəmizlə bölüşməyə hazır olduğumuzu vurğulayıb. Səfir E.Abdullayev Azərbaycanın Afrikada təhsilin inkişafına töhfə verdiyini, xüsusilə qızların təhsili sahəsində ölkəmizin dəstəyi ilə YUNESKO ilə birgə qitə üçün xüsusi əhəmiyyət kəsb edən layihələrin həyata keçirildiyini vurğulayıb.

Afrika İttifaqı Komissiyasının sədri M.Mahamat zəngin enerji ehtiyatları olan və qısa müddət ərzində əhəmiyyətli inkişaf yolunu keçən Azərbaycanın iqtisadiyyatının şaxələndirilməsini nümunəvi və təqdirəlayiq adlandırıb, bu sahədə ölkəmizin əldə etdiyi təcrübəsinin bütün dünya, o cümlədən Afrika ölkələri üçün də önəmli olduğunu bildirib. Azərbaycan tərəfindən Afrika ölkələri ilə münasibətlərin inkişafı istiqamətində atılan addımları yüksək qiymətləndirən M.Mahamat, Azərbaycanın dəstəyi ilə Afrikada həyata keçirilən layihələrin Komissiya üçün də prioritet istiqamətlərdən olduğunu vurğulayıb. O, həmçinin Afrika İttifaqı Komissiyasının ölkəmizlə əməkdaşlığı davam etdirməyə, Azərbaycanın qitə ölkələri ilə münasibətlərinin möhkəmləndirilməsində Afrika İttifaqı Komissiyasının platforma rolunu oynamağa hazır olduğunu qeyd edib.

scroll top