» » » Azərbaycan və Rusiya sərhəd təhlükəsizliyinə olan təhdidlərlə mübarizəni gücləndirəcək

Azərbaycan və Rusiya sərhəd təhlükəsizliyinə olan təhdidlərlə mübarizəni gücləndirəcək


Qusarda Dövlət Sərhəd Xidmətinin rəisi general-polkovnik Elçin Quliyev və Rusiyanın Federal Təhlükəsizlik Xidməti direktorunun birinci müavini – Sərhəd Xidmətinin rəhbəri ordu generalı Vladimir Kulişovun rəhbərlik etdiyi nümayəndə heyətləri arasında işçi görüş keçirilib.

“Report” xəbər verir ki, görüşdə tərəflər arasında Azərbaycan-Rusiya sərhədində, dövlət sərhədindən buraxılış məntəqələrində, o cümlədən Xəzər dənizinin akvatoriyasında mövcud vəziyyət barədə fikir mübadiləsi aparılıb, sərhəd təhlükəsizliyinə olan təhdidlərlə mübarizə sahəsində qarşılıqlı əlaqənin inkişaf etdirilməsi, dövlət sərhədinin demarkasiya işlərinin həyata keçirilməsində birgə fəaliyyətlərin davam etdirilməsi, gələcək əməkdaşlığın perspektivləri üzrə məsələlər nəzərdən keçirilib.

Azərbaycan və Rusiya sərhəd qurumlarının rəhbərləri ikitərəfli əməkdaşlığın inkişaf dinamikasını müsbət qiymətləndiriblər, qarşılıqlı əlaqələrin dövlət sərhədində qanunsuz fəaliyyətlərlə mübarizəyə əhəmiyyətli töhfə verdiyini vurğulayıblar.

Müzakirələr zamanı Azərbaycanın dövlət sərhədindəki əməliyyat şəraiti, o cümlədən Ermənistanın təcavüzü nəticəsində ölkə ərazisinin 20%-nin və dövlət sərhədlərinin bir hissəsinin işğal altında saxlanılmasının sərhəd təhlükəsizliyinə əsas təhdid olaraq qalması diqqətə çatdırılıb.

Görüşün sonunda “Rusiya Federasiyasının Federal Təhlükəsizlik Xidməti və Azərbaycan Respublikasının Dövlət Sərhəd Xidmətinin nümayəndə heyətlərinin işçi görüşünün Protokolu” imzalanıb.

Interesting facts scroll top